Payız ayları bir tərəfdən sərin havanın rahatlığını, təbiətin rəngarəng mənzərəsini və sakit yürüşləri xatırlatsa da, digər tərəfdən bir çox insanda allergik problemlərin artdığı dövrə çevrilir. Burun tutulması, gözlərin sulanması, davamlı asqırma və ümumi halsızlıq gündəlik həyatı xeyli çətinləşdirir. Bu əlamətlərin əsas səbəblərindən biri payız riniti hesab olunur. Onun yaranmasına havada dolaşan polenlər, rütubətin çoxalması və kif göbələklərinin aktivləşməsi təsir göstərir.
Adətən belə hallarda insanlar ilk olaraq kimyəvi damcılara müraciət edirlər. Onlar sürətli təsir göstərsə də, uzunmüddətli istifadədə bəzi problemlər ortaya çıxır: selikli qişanın quruması, orqanizmin dərmana öyrəşməsi və damcı kəsildikdə simptomların daha da şiddətlənməsi kimi. Məhz buna görə də təbii üsullara maraq günü-gündən artır.
Ən sadə, eyni zamanda effektiv alternativ duzlu su ilə burun yuyulmasıdır. İstər apteklərdə satılan dəniz suyu spreyləri, istərsə də evdə hazırlanmış məhlullar burun boşluğunu allergenlərdən təmizləyir, nəfəs almanı yüngülləşdirir və dərmanlara ehtiyacı azaldır.
Bitki mənşəli vasitələr də yaxşı nəticə verə bilər. Aloevera tərkibli damcılar burun selikli qişasını yumşaldır, nanə yağı sərinlik hissi yaradır, ekinezya isə immun sistemini gücləndirir. Bu məhsullar kimyəvi damcılarla müqayisədə daha yumşaq təsir göstərir və uzun müddət istifadədə əlavə risk yaratmır.
Ənənəvi üsullardan biri də inhalyasiyadır. Qaynar suya çobanyastığı, lavanda və ya okalipt damcıları əlavə edib buxarı nəfəsə çəkmək burun yollarını açır, iltihabı azaldır və ümumi rahatlama gətirir. Boğaz qaşınması və nəfəs darlığı yaşayanlar üçün bu metod xüsusilə faydalıdır.
Qidalanma da allergiyanın idarə olunmasında mühüm rol oynayır. Omeqa-3 ilə zəngin balıq yağı, qoz və kətan toxumu iltihabi prosesləri zəiflədir. Soğan, yaşıl çay və alma tərkibindəki kversetin maddəsi ilə təbii antihistamin təsir göstərir. C vitamini ilə zəngin qidalar isə immuniteti gücləndirərək orqanizmi mövsümi dəyişikliklərə daha davamlı edir.
Evdə təmiz və sağlam mühit yaratmaq da simptomların qarşısını almağa kömək edir. Pəncərələrin uzun müddət açıq qalması toz və polenlərin evə daxil olmasına şərait yaradır. Hava filtrlərindən istifadə, yataq dəstlərinin mütəmadi yuyulması və tozsoranla tez-tez təmizlik allergik təsirləri minimuma endirir.
Nəticə etibarilə, payız allergiyaları ilə mübarizə yalnız dərman damcılarına bağlı deyil. Sadə, lakin təsirli üsullar – duzlu su yuyulmaları, bitki ekstraktları, inhalyasiya və düzgün qidalanma – həyat keyfiyyətini yaxşılaşdıra bilər. Əgər simptomlar çox güclü və davamlıdırsa, həkimə müraciət etmək vacibdir. Amma vaxtında görülən təbii tədbirlər sayəsində allergiyanın təsirlərini azaltmaq və payızın bütün gözəlliyindən zövq almaq mümkündür.
